Naskal Ketoprak SKANDAL SENGKUNI

ADEGAN                              :  SERAMBI KAPANEWON ( Introducing )

SWASANA          : KENCENG

IRINGAN                              : ......................

PROPERTI            : TENGGOK – JANGANAN – PADI – PIKULAN – BUKU

PARAGA                              : 1. PENEWU SENGKUNI

                                                  2. BEBAU SANDI KAPANEWONAN

                                                  3. TIYANG –TIYANG DUSUN

                                                  4. JURAGAN BRONO LUWIH

KATRANGAN     : a. Tiyang-tiyang dusun sami asok glondhong pengarem-arem datheng Kapanewon. Sami bekta wulu wektu. Wonten ingkang dipun pikul ugi wonten ingkang dipun gendhong mawi tenggok.

01. PENEWU SENGKUNI

( Kemaki sok kuwasa ) Heh !ayo rene ! klelat-klelet. 

Lajeng ngundhang bebaunipun sepados nyatet. Kaliyan ngodhol-odhol isinipun bulu bekti ingkang dipun bekta tiyang-tiyang dusun.

Sandi ! iki ?! Dicatet !( kumawasa ) Kowe kuwi piye ta heh !

asok wulu wektu kok sudha terus ! Sasi ngarep pari. Sasi kepungkur Gedhang !

Sakiki kacang.....!  Suwe-suwe mung arep ngemplang ora pasok ta ?Hiya ora !

Tiyang-tiyang dusun namung mendhel kemawon ketingal ajrih.

Dhatengipun Juragan Brono luwih.

02. PENEWU SENGKUNI

( Grapyak – Semanak ) Weh,..... Mangga-mangga Jurugan..

Mboten sisah antri. Mangga,...mangga. ( Dhateng Sandi )Diurusi.wong cilik-cilik iki.

( Dhateng Juraga Brono Luwih ) Mangga....mangga.....tindhak melbet kemawon.

Penewu Sengkuni lajeng ngejak juragan Brono Luwih.......Mojok.

DI BALIK LAYAR. SILUET. Ketingal Penewu sengkuni kaliyan Juragan Brono Luwih sami rembagan konspirasi rekayasa Glondhong pengarem-arem ingkang kedah dipun unjukaken wonten ing Kadipaten.

MLEBET : TELOP. Lawasan yoben./ craedit title.

ADEGAN                              : KA 1. KABUPATEN MEDHANG MIRING

SWASANA          : AGUNG

IRINGAN                              : AGUNG

PROPERTI            : BUAH-BUAHAN

PARAGA                              : 1. BUPATI KANDHA MARUTA

                                                  2. PATIH MEGA MENDHUNG

                                                  3. PENEWU SENGKUNI

                                                4. BEBAU SANDI

                                                  5. INDRAYANA

KATRANGAN     : a. Bupati diadhep para nayaka praja. Ngermbag perkawis kabupaten Medhang Miring.Ingkeng sudha Wulu wekdalipun.

01.BUPATI KANDHA MARUTA

( Duka. Gebrak meja – Close, meja )Piye... Wakne Sengkuni !

Wulu wektu Kabupaten saben tahun. Saben sasi sudha terus kuwi piye ?!

02.PENEWU SENGKUNI

( Nyembah ) Injih nyuwun pangapunten ndara Bupati..... pancen tahun menika Kabupaten Medhang Miring nembe krisis...... Kula mesakaken kawula menawi kula peksa. Nglunasi bulu bekti....... Jalaran gesangipun injih nembe rekaos.....

Ingkang kaluwihan bandha sami ndhablek. Ngemplang asok glondhong pengarem-arem wonten Kabupaten Medhang Miring.

03.BUPATI KANDHA MARUTA

Kok isa ?

04.PENEWU SENGKUNI

( Mantep – Cetha ) Mergi wonten konspirasi kaliyan nayaka praja Medhang Miring... Dados wonten markusipun....Markus Bulu Bekti....

05.BUPATI KANDHA MARUTA

Sapa ?

06.PENEWU SENGKUNI

( Nyembah – alus ) Nyuwun pangapunten..... menawi  kepereng perkawis menika dipun rembag kanti tertutup kemawon... Mboten terbuka.....

07.PATIH MEGA MENDHUNG

( Nyembah – Alus ) Nyuwundalem sewu Kanjeng.... Kepareng kula nanggapi aturipun Penewu Sengkuni ?

08.ADIPATI KANDHA MARUTA

Yoh..... ndhak keparenge....

09.PATIH MEGA MENDHUNG

Dhi Penewu Sengkuni ?Sliramu kuwi nek matur aja mung waton matur. ?

Ning matura nganggo wewaton..... Sliramu kandha nek anggone para Sudagar ngemplang ora pasok bulu bekti kuwi ana sing Dombani.... Dalange nayaka praja Medhang Miring..... Bareng Ndara Bupati mundhut pirsa kowe matur nek perkara iki kudu kanti tertutup.... Nek pancen Aturnu kuwi akurat... Kena apa ora dibuka kanti terang.... Ben kabeh nayaka praja mudhune kawula Mendhang Miring ngerti... Dadi kawula kuwi ora bingung......

10.PENEWU SENGKUNI

Lo,.... menawi kula matur ca blaka kula saget diwastani nglanggar kode etik....?

11.PATIH MEGA MENDHUNG

Kowe mestine ngerti pranatan ing kadipaten Medhang Miring.... ?

Tumprap ukum kuwi ora mandhang sapa wae.... Nek pancen ukum kuwi ora mung diwaca, nanging dilaksanake....Yen sliramu mung nyebar khabar lamat2 kaya ngono kuwi teges sliramu arep gawe bingung lan ngalihake perkara sing durung tinarbuka....

12.PENEWU SENGKUNI

Nyuwun sewu rekyana Patih Mega Mendhung...Penjenengan menika kok mesti negatif tenking ta menawi kaliyan kula... kalenggahan njih inggil penjenengan ? Bandha njih mesti kemawon,....?

13.PATIH MEGA MENDHUNG

( Cepet nyahut – Cetha ) Okeh kowe !?

Merga sing cedhak karo para Sudagar kuwi kowe ? Hiya Ta ?

14.PENEWU SENGKUNI

( Cepet nyahut – kemaki ) Lo.... niku jenenge dakwa lo ? Napa nek kula celak kaliyan para sudagar niku mesti trus sugih napa ? Umpama kula sugih niku rak nggih limrah ta ? Samben kula nggih katah..... ? Kalih malih niku nandhake nek kula luwih dipercaya tinimbang pendhuwur kula.....

15.PATIH MEGA MENDHUNG

Pendhuwur sapa ?Aku apa ?!

16.PENEWU SENGKUNI

( Sakpenake ) La penjenengan rumaos dados pendhuwur kula menapa dede....?

17.BUPATI KANDHA MARUTA

( Wibawa – Cetha ) Wis...wis.... cukup !Kok malah ngalor ngidul ora karuan.... sing bakal tak rembug kuwi ngenani anggone saya medhun...saya medhun..bulu bekti keng mlebu ana ing Kadipaten...La nek pancen ana sing mbetengi para sudagar ngemplang anggone pasok bulu bekti kuwi sing perlu di usut....

18.PATIH MEGA MENDHUNG

( Nyembah ) Nyuwun pangapunten dalem Kanjeng. Awit ingkang beberaken perkawis ngemplanging para sudagar menika Penewu Sengkuni ?

Ateges injih Penewu Sengkuni menika ingkang gadah data ?

Pramila kula nyuwun perkawis menika dipun rembag kanthi terbuka... kanjengipun kawula Dalem Medhang Miring saget ngertos.

19.BUPATI KANDHA MARUTA

Piye Penewu Sengkuni....?

20.PENEWU SENGKUNI

Mangke menawi sampun titi wancinipun, temtu bade kula mbikak perkawis menika... nanging menawi kula supados beberaken sakmenika,  Kula ajrih menawi malah dados ruwet perkawisipun. Kaliyan malih kula taksih pados bukti ingkang akurat .

Awit menika ngembet tiyang katah...

21.PATIH MEGA MENDHUNG

( Nyembah ) Menawi wonten kepareng Dalem..Enggal kemawon Nandalem utusan nayaka pados sisik melik perkawis ingkang dipun unjukaken Penewu Sengkuni menika Kanjeng.Jalaran perkawis menika menyangkut kawibawan Ndalem mandhaping Nayaka Praja Mendhang Miring.

Penewu Sengkuni Kemaki njupuk buah nanging dipun samplak tanganipun kaliyan Bupati Kandha Maruta 

22. BUPATI KANDHA MARUTA

Heh.... ! Sapa sing dhawuh ?!

23. PENEWU SENGKUNI

( Cengingas-cengingis kewirangan ) He...he.... Kepingin.......

24. PATIH MEGA MENDHUNG

( Sajak ngece ) Syukurrr !wong kok lancang..... ora didhawuh kok trunyukan...

25. PENEWU SENGKUNI

( Nyembah ) Nyuwun pangapunten Kangjeng....

Menawi saking wawasan kula perkawis menika kedah ngatos-atos anggenipun ngrampungi. Menawi mboten kawula Medhang Miring saget bergejolak. Kepercayaan kawula tuprap kawibawandalem saget pudar.

26. BUPATI KANDHA MARUTA

Seka kuwi aku arep membentuk Tim kanggo nylidhiki perkawis Markus bulu bekti iki. Mula perkara iki kudu enggal bisa terungkap. Sapa saktemene sing bermain lan terlibat ana ing perkara iki. Sakiki timbalana Indrayana supaya ngadhep aku.

27. PATIH MEGA MENDHUNG

( Nyembah- - Mantep ) sendika !

( Kaliyan Penewu Sengkuni ) Aku apa kowe sing nimbali Indrayana...?

28. PENEWU SENGKUNI

Patihe niku kula napa sampeyan...?

29. PATIH MEGA MENDHUNG

( Radi sengol ) Ha hiya aku ?!

30. PENEWU SENGKUNI

Lajeng ingkang dipun utus menika sinten.....?

31. PATIH MEGA MENDHUNG

Ha hiya aku.......

32. PENEWU SENGKUNI

Ha injih mangga.... ( Grenengan )Nek gaweyan kok ditawak-tawake.

Ning nek nampa kekucuhan nglegem meneng wae.....

33. PATIH MEGA MENDHUNG

Sapa kuwi...... ?   Grenengan...... Adate kuwi sok cemongol-congol.... ben kethok.

34. PENEWU SENGKUNI

( Sengol ) Kula..kula !  Lereke mung arep ngenani aku ta ?..ndhadak mubeng menger.

Patih Mega Mendhung lajeng nimbali Indrayana . OUT.

IN malih sampun kaliyan Indrayana

35. PATIH MEGA MENDHUNG

( Nyembah ) Menika Indrayana Kanjeng...Sumangga anggenandalem paring dhawuh.

36. BUPATI KANDHA MARUTA

Mestine sliramu kaget ndhak timbali.....

37. INDRAYANA

( Nyembah – Alus ) Nun injih Kanjeng.... Sabda dhawuh dalem.

38. BUPATI KANDHA MARUTA

( Sareh – Wibawa ) Rebut cukup wae Indrayana. Sliramu ndhak timbali iki bakal tak dhawuhi membentuk Tim peneliti ngenani para sudagar keng pada ngemplang anggone asok Bulu Bekti ana ing kabupaten Mendhang Miring.

Apa bener angone pada ngemplang mau merga ana konspirasi karo Nayaka Praja Medhang Miring. Yen pancen ana enggal unjuk aturna aku.

39. INDRAYANA

( Nyembah – Alus ) Nun injuih sendhika ngestokaken dhawuh Kanjeng.

CUT TO :

ADEGAN                              : KA III. DALEM KAPANEWON

SWASANA                          : GEMBIRA

IRINGAN                              : NGUNDHAMANA

PARAGA                              : 1. EMBAN

                                                  2. JURUTAMAN

                                                  3. NYI PENEWU

                               

KATRANGAN     :a. Emban kaliyan Jurutaman Nembang Ngundhamana.

01. JURUTAMAN

( Merayu ) Oh,.... ? Dhiajeng Mbiting....I love you full.....

02.EMBAN

( Kemayu – Manja ) Wegah aku,.... ndhak kaya mbah Surip......Kula sampun mbiting ta kramas... i’hik....i’hik.....

03.JURUTAMAN

Mbiting kuwi mbabi glinting.........

( Sengol ) Huuu,.... Kemayu ! Rumangsamu dadi apa ta kowe ?!

04. EMBAN

( Clingusan ) Lo... ya aja kaya ngono Kang...... Ya sekali-sekali ta, ngrasake dadi wong mukti.... Apa mung wong sing kesinungan bandha Sing oleh seneng. Lan Bahagia..... ? Aku kuwi ya dhuwe hak seneng.......

Enyel-enyelan gojeg sak-cukupe... Improvisasi. Ning kudu lucu....

Dhatengipun : Nyi Penewu.

05. NYI PENEWU

( Alus – Wibawa )E..e..e... dha ngapa ta ya ? Tak mirengke seka patunggon kok kaya le gayeng banget.

Emban kaliyan Jurutaman ketingal ajrih. Clingusan saling menuding.

06. NYI PENEWU

( Alus – Cetha ) Ya kaya ngene iki lo, sing marahi nambahi ruweting praja.

Kowe kuwi abdi kapanewon. Abdine Ndara penewu Sengkuni wae padha saling curiga... Padha ora gelem ngakoni kesalahane malah padha saling nyalahke cokot –cokot dadeke kawula banjur tipis kepercayaning marang nayaka praja.

 07. JURUTAMAN

( Nyembah ) Injih nyuwun pangapunten Ndara. Kula kok ingkeng lepat...

08. NYI PENEWU

La ngono kuwi nek malah apik ta ?ngakoni keluputane. Banjur njaluk pangapura..

nek malah ora udrek-udrekan ta ? Rampung.

09. JURUTAMAN

Injih Ndara.......

10. NYI PENEWU

Wis,..sak-iki neng ngendi momonganmu.. Rayung Wulan...?

11. EMBAN

La,... menika wonten kolam sakcelaking regol ngajeng.... Nembe miru sinjang.

Ngendhikanipun kaliyan nengga janakanipun... injih Nakmas Indrayana...

12. NYI PENEWU

Em,.... ,bok coba aturana supaya mrene...

13. EMBAN

Injih sendika Ndara Newu...

Emban lajeng ngaturi Rayung Wulan...

CUT TO :

ADEGAN                              : KA IV. TAMAN KAPANEWON

SWASANA                          : ROMANTIS

IRINGAN                              : ROMANTIS

PROPERTI            : KAIN JARIK

PARAGA                              : 1. DEWI RAYUNG WULAN

                                                  2. EMBAN

KA                                    KATRANGAN     : a. Dewi Rayung Wulan nembe miru jarik sinambi nengga

dhatengipun Indrayana pacanganipun  

01. EMBAN

( Nggetak ) Ha,yoh ! Ngalamun !

02. DEWI RAYUNG WULAN

( Kaget ) E,eh ! Biyung kuwi lo ?Senenge get-geti.

               

03. EMBAN

He,.he,..nembe menapa hayo ? Mesti nembe nengga janaka Medhang Miring.Injih ta?

04. DEWI RAYUNG WULAN

La nek aku nunggu janakaku ya ngapa ta Yung ?Serik pa kowe ?

05. EMBAN

Ha, njih mboten,.. Wong kula ya wis tau ngrasake yen lagi ketaman asmara kok.

06. DEWI RAYUNG WULAN

La gene...? Kok senengane ngganggu lo.

07. EMBAN

Kula manika mboten bade ngganggu ndara. Nanging kula dipun utus inegkeng Ibu .Kapurih nimbali penjenengan.

Rayung Wulan lajeng marak ingkeng Ibu.

CUT TO : Wangsul dhateng dalem kapanewon.

ADEGAN                              : KA V. DALEM KAPANEWON

SWASANA                          : LUMRAH – ROMANTIS

IRINGAN                              : SAMPAK – ROMANTIS

PROPERTI            : BUKU CATATAN

PARAGA                              : 1. NYI PENEWU

                                                  2. DEWI RAYUNG WULAN

                                                  3. PENEWU SENGKUNI

                                                  4. BEBAU SANDI

                                                  5. INDRAYANA

KATRANGAN     : a. Dewi Rayung Wulan ngadhep nyi Demang

01.NYI PENEWU

( Grapyak ) Kene,...kene,... cah ayu Dewi Rayung wulan....

02.DEWI RAYUNG WULAN

Injih Ibu,...Wonten wigati menapa ibu nimbali kula ?

03.NYI PENEWU

Ya mung kepingin wawan rembug marang sliramu kok Cah ayu.

Lagi ngapa iki mau, heh ?

04.DEWI RAYUNG WULAN

Nembe.........

05.NYI PENEWU

( Cepet nyahut ) Lagi nunggu Indrayana ? Hiya apa ?

06.DEWI RAYUNG WULAN

( Radi lingsem ) Injih Ibu,...

07.NYI PENEWU

( Alus – Cetha ) Ngono ya ngono ning mbok ya aja ngono,? Krasa lo? calon garwamu nek tansah tok antu-antu kaya ngono kuwi ? Merga tresnane marang sliramu bisa tumus ing ati. Marahi kemrungsung yen arep tumindhak apa wae.

08.DEWI RAYUNG WULAN

( Nyembah – Alus ) Nyuwun pangapunten Ibu. Menapa injih klentu menawi kula menika ngajeng-ajeng kangmas Indrayana. Jer kangmas Indrayana menika calon garwa kula. Rak Injih sampun sak-limrahipun ta Ibu.

09.NYI PENEWU

Ya pancen ora kleru. Ning yen kaya ngono sikapmu kuwi jenenge sliramu ora menehi kebebasan marang Indrayana. Karo meneh sliramu ya kudu ngerti. Menawa Indrayana kae senajan ora duwu kedudukan ana ing kapanewon munggahing kadipaten Medhang Miring nanging calon garwamu kuwi piyayi sing disuyuti dening kaum muda lan di sungkani marang kabeh nayakapraja medhang Miring dadi panutan lan wis dianggep tokoh masyarakat.

10.DEWI RAYUNG WULAN

Injih,kula ngertos Ibu. Nanging ati wanita menika mboten saget pun pungkiri menawi tansah sumelang lan kuwatos menawi calon garwanipun ndangu mboten wonten kabaripun.

11. NYI PENEWU

( Cepet nyahut ) Ya ati kaya ngono kuwi sing kudu tok peper. Sapa ngerti yen calon garwamu kuwi lagi ana perkara sing kudu dirampungke.

Dhatengipun Indrayana.

12.INDRAYANA

Kula nuwun Ibu......

13,NYI PENEWU

( Grapyak ) Weh,... mangga...mangga... Nakmas...

14.INDRAYANA

( Alus ) Injih Ibu....

15. NYI PENEWU

Gelo,... sing tok arep-arep wis teka..

16. DEWI RAYUNG WULAN

( Radi lingsem ) Ibu menika mesti ngaten lo ?

17. NYI PENEWU

Lo,... wong nyatane rak ya ngono ta ? Kaya Ibu kuwi ora nate dadi cah enom.

Ibu kuwi wis nate kaya sliramu,... ning sliramu rak durung nate kaya Ibu ta ?

Ngono wae ndadak......

18. DEWI RAYUNG WULAN

( Cepet nyahut - Radi lingsem - Alus ) Ibu menika lo,....

19. NYI PENEWU

Iki mau sliramu rak tansah ditunggu-tunggu lo Nakmas Indrayana...

20. DEWI RAYUNG WULAN

Mboten kangmas. Ibu menika remenanipun ngaten menika..

21. NYI PENEWU

Ha, yah,.. tenane,... ? Ngono wae kok isin lo...? wong nyatane mau le ngarep-arep ya nganti mata walangen kok. Bareng sak-iki wis teka ngganggo isin barang,... Hiya ora ?

Dhatengipun Penewu Sengkuni nyawang Indrayana sajak kirang remen.

Lajeng mlebet pepungkuran.

22. DEWI RAYUNG WULAN

( Ngungun ) Ibu,... Rama Penewu menika........

23. NYI PENEWU

( Cepet nyahut ) Wis dikepenake dhisik ....Mangga lo Nakmas Indrayana dipun sekecakaken..Ibu tak nyuwun pirsa Ramamu....

Nyi Penewu lajeng mlebet nututi Penenwu sengkuni.

Bebau Sandi ingkang ndherekaken Penewu sengkuni nyawang Indrayana ugi lajeng mlebet.

24. INDRAYANA

( Nyawang – unjal napas ) Ndara Penewu kae sajake lagi ana bab sing dipenggalih.. Mula ayo awake dhewe sumingkir wae dhisik.

25. DEWI RAYUNG WULAN

Injih mangga kangmas.

Indrayana kaliyan Dewi Rayung Wulan lajeng sami sumingkir.

IN : Penewu Sengkuni sinambi ngunjuk ketingal mangkel manahipun.

Nyi Penewu nututi wonten wingkingipun kaliyan bekta buah-buahan.

26. NYI PENEWU

( Alus ) Wonten menapa ta kangmas Penewu ? Kok mboten kados adat saben ?

Wong ana nakmas Indrayana calon mantune barang kok ya.... ?

27. PENEWU SENGKUNI

( Cepet nyahut - Sengol ) Nek ana Indrayana terus ngapa ?!

Kon nggendhong ngono apa ?!

28. NYI PENEWU

Njih mboten ngaten menika.. Rak ya saru ta ? menawi dipun sawang calon mantu...

29. PENEWU SENGKUNI

( Sengol – Sinis ) Sing kandha sapa ?! Mulane nek ora ngerti kuwi meneng wae !

Ora drimimil crigis terus !

30. NYI PENEWU

( Radi jengkel ) Ha injih mboten saget.  Nek kon meneng wae.

Wong nyawang garwane salin serengat kok kon meneng wae ! Mulane kula kudu ngerti tenane niku onten napa  ?Teka-teka kok njur mbesengut.Pasuryane nglumpuk.

31. PENEWU SENGKUNI

( Grenengan – Jengkel ) Cah kuwi nak ora dhuwe aturan ! Tlunyak-tlunyuk !

32. NYI PENEWU

Mangke rumiyin ta ?Ingkang mboten gadah aturan niku sinten ?

Trus sing tlunyak-tlunyuk niku sinten ?

33. PENEWU SENGKUNI

( Sengol ) Ha hiya Calon mantumu kae !

34. NYI PENEWU

( Ngungun ) Mangke rumiyin ta ? Calon mantuku,..? Indrayana menapa ? Penjenengan menika dos pundhi ta ? Nakmas Indrayana menika rak ya asring tindhak kapanewon ta ? kesupen menapa dos pundhi ? Wong malah penjenengan njih sampun paring lilah, malah ugi sampun mangestoni sambung tresnanipun ingkeng putra kaliyan Nakmas Indrayana. Injih mboten ?

35. PENEWU SENGKUNI

( Sengol ) Kuwi nek mbiyen !

36. NYI PENEWU

( Saya bingung ) Kula kok malah samsaya ora mudheng kaliyan pangandika penjenengan ta ? Tenane niku onten napa ta ?

37. PENEWU SENGKUNI

( Cetha – Sengol ) Sengara mudheng. Ngertimu kuwi apa ?

Biyen aku pancen nggadhang Indrayana kuwi dadi mantuku. Merga harapanku bisa ngewangi aku nutup perkara sing lagi dadi kembang lambe. Ning Indrayana malah saguh membentuk tim kanggo bongkar skandal Medhang Miring.

Kamangka yen nganti kebongkar tenan, perkara iki akeh sing terlibat. Klebu......

CUT TO : PARAREL

ADEGAN                              : KA VI. TAMAN KAPANEWON

SWASANA                          : KENCENG

IRINGAN                              : ILUSTRASI PERKUSI

PARAGA                              : 1. INDRAYANA

                                                  2. DEWI RAYUNG WULAN

                                                  3. BEBAU SANDI

KATRANGAN     : a. Pararel adegan KA.V. Dialog Penewu sengkuni.

 01.INDRAYANA

( Pararel dialog Penewu Sengkuni – Cetha ) Rama Penewu Sengkuni.

Lan akeh Nayakapraja sing uga terlibat ngenani skandal iki.

Malah indikasine Kanjeng Adipati bisa uga terlibat. Kuwi sing njalari Rama sengkuni beda tumanggape marang aku. Jalaran aku nyaguhi mbentuk tim bongkar skandal iki.

 02. DEWI RAYUNG WULAN

O,... Menika ta perkaranipun. Ha mbok njih sampun penjenengan ora usah melu-melu perkara menika. Menawi tundhonipun saget ngancam kasugengan penjenengan.

 03. INDRAYANA

( Matep ) Aku ora isa lepas tangan nganani skandal iki, Rayung Wulan. Merga yen aku ora wani bongkar mengkono dadi ora karu-karuan kahanan Medhang Miring. Jalaran skandal iki wis ora isa ditolerensi meneh. Merga ora mung ngrugeke Kadipaten Medhang Miring. Nanging kawula sing kena imbase. Sing kudune wulu wektu mau kena kanggo mensejahterakan kawula nanging padha di rayah dening Nayakapraja. Klebu,...

 04. DEWI RAYUNG WULAN

( Radi mangkel – Manja ) Rama sengkuni,..?! Injih ta ?!( Mlengos nebih )

 05. INDRAYANA

( Alus ) Lo,...lo,...lo,... Ya aja njur kaya ngono kuwi ta Rayung Wulan....

Iki tanggung jawab moral kanggo njejekake pranatan keng bersih dan berwibawa.

06. DEWI RAYUNG WULAN

( Taksih radi mangkel ) Kula ngertos kangmas. Nanging kula menika namung ngeman penjenengan.Menawi ngantos terlibat perkawis skandal menika.

Paribasan geni menika sampun ageng. Menawi penjenengan mbudidaya bade nyirep geni ingkeng sampun ageng mremen wonten pundi-pundi tundhone malah penjenengan piyambak ingkeng bade cilaka. Menapa malih kula yakin. Penjenengan temtu bade fokus perkawis skandal menika. Trus lali kaliyan kula.Kirang perhatianipun tupram kula. Injih Ta ?Sami kemawon tipis katresnan penjenengan tuprap kula.

 07. INDRAYANA

Kosik ta ? Sliramu aja trus dhuwe panyakrabawa kaya ngono kuwi Cah Ayu.

Karo meneh sliramu kudu bisa milah-milahake Katresnan lan Kuwajiban.  

Ngenani kuwajiban iki pancen kudu tak rampungake. Yen ngenani katresnan sliramu tak kira wis bisa mbuktekake. Menawa ora ana wanita keng ngratoni atiku kejaba sliramu.Apa perlu aku mbukteke meneh Cah Ayu........

Nembang romantis.

Dhatengipun Emban.

 08. EMBAN

Nyuwun pangapunten. Ngganggu Ndara. Penejenengan dipun timbali ingkeng Rama.

09. DEWI RAYUNG WULAN

Kangmas,...? mangga sesarengan sowan Rama..

10. INDRAYANA

Ora Rayung Wulan. Aku malah arep nyuwun pamit. Aturna Rama lan Ibu.

Menawa aku pamit. Sungkemku wae katur ya.

Rayung Wulan lajeng kesah. Indrayana nyawang kesahipun Rayung Wulan.

IN : Bebau Sandi mlampah mboten nggatosaken Indrayana. CUT TO :

ADEGAN                              : KA VII. OMAH SUGIH

SWASANA                          : GUMYAK

IRINGAN                              : GECUL

PROPERTI            : TENGGOK – JANGANAN – PADI – PIKULAN – BUKU

PARAGA                              : 1. GONYAK

                                                  2. GANYUK

                                                  3. JURAGAN BRONO LUWIH

                                                  4. TIYANG-TIYANG DUSUN

KATRANGAN     : a. Gonyak-Ganyuk sami gegojegan sak-cukupe. Improf.

 01.GONYAK

( Saksampunipun gojek ) Nyuk.Iki piye kok ora cocok karo catetane.

02. GANYUK

Wegah nek le nggundhang mung Nyuk.Mengko dikira munyuk.

03. GONYAK

La kon nggundhang sapa wong jenenge Ganyuk. Penake kuwi rak ya disingkat ta.Nyuk. Apa kon nggundhang Gan.... Ko malah dikira juragan.

04. GANYUK

Ha ya dikompliti. Ganyuk. Senenge kok korupsi. Ming jeneng wae kok dikorupsi.

 05. GONYAK

Ya wis....Iki piye selip lo. Karo catetane iki. Karo meneh iki piye ta leh mu nyatet ?

Kok malah tok gambar. ?

06. GANYUK

Wah,..kowe kuwi kuper tenan kok. Iki laporan tentang dagangan bolah.

Bolah kae gambare rak ya ruwet ta. Ha iki gambar bolah.

06. GONYAK

O,.. dadi nek laporan dagangan kuwi miturut dagangane ta ? Nek dangane Bolah laporane gambar ruwet ngene iki. Ha nek dagangane uyah ya terus tok gambari laut...

07. GANYUK

Ha hiya. Laut kuwi rak asin. Sama dengan uyah. Nek gula ya gambar semut. Ada gula pasti ada semut. Ya ora ? Wong kuwi kudu kreatif...

Dhatengipun juragan Brono Luwih

 08. JURAGAN BRONO LUWIH

Heh ! Kowe kuwi malah dha ngapa ta ?Tak rungoke seka njero kok udrek – udrekan.

09. GONYAK

Mangga Juragan. Menika nembe nyateti dagangan ingkeng medhal....

10. JURAGAN BRONO LUWIH

Piye wis tok cedhaki wong-wong sing dha asok bulu bekti ? Iki bisnis lo ?

11. GONYAK

( Mantep ) Sampun Juragan. Menika mangke bade sowan mriki....

 12. GANYUK

( Mantep ) Mboten namung tiyang ingkang bade asok bulu bekti. Nanging tiyang ingkang sami ngemplang Wulu Wektu mboten asok glondhong pengarem-arem ugi kula cedhaki. Kula sarankan sowan penjenengan.

13. JURAGAN BRONO LUWIH

Bagus nek ngono. Merga aku wis kerja sama karo ndara Penewu Sengkuni. Ning iki aja nganti bocor lo ya ? Merga yen nganti bocor kowe uga bakal melu cilaka.

Dhatengipun tiyang-tiyang dusun ingkeng bade asok bulu bekti.

14. KANG TEMU

Kula nuwun Juragan.....

15. JURAGAN BRONO LUWIH

( Grapyak ) Weah,... mangga...mangga... Mangga lo lenggahipun.

16. KANG TEMU

Injih Juragan. Teka kula niki makili sanak kadhang sing ajeng pasok bulu bekti. Ngendhikane Juragan saget nggiguhaken supados anggenipun pasok bulu bekti saget ringan.Lan tiyang ingkang telat anggenipun pasok saget pikantun keringanan.

17. JURAGAN BRONO LUWIH

Pun beres. Mangke kula iguhke. Adate sampeyan nek pasok pinten bagor pinten karung saben tahune...?

18. KANG TEMU

Nggih kinten-kinten limang bagor.Kamangka niki onten sing pun limang tahun mboten pasok je.

19. JURAGAN BRONO LUWIH

Perkara ngemplang niku gampang.Nek liwat kula mangke sampeyan isa mung pasok telung karung.Lan sih ngemplang limang tahun dereng asok bulu bekti, mangke kula tak matur sing telung tahun dihapus. Dadi mung pasok Rong tahun.Pripun.?

20. KANG TEMU

Wah nggihpun ndherek mawon nek ngaten...

21. JURAGAN BRONO LUWIH

( Kaliyan Gonyak-Ganyuk ) Iki dha didaftar sing arep dha asok bulu bekti.

22. GONYAK

Nggih  Juragan.....

Gonyak-Ganyuk nyateti tiyang-tiyang dusun ingkeng bade pasok bulu bekti.

Dhatengipun Penewu Sengkuni kaliyan Bebau Sandi . Lajeng pun jak mlebet kaliyan Juragan Brono Luwih.

CUT TO : KASAMBET SERI II.