MBANYU MILI

                                Karya: RACHMAT DJOKO PRADOPO

Kang ilang ora bakal bali

Banyu mili tumuju segera

Nadyan ana kenangan tansah ngalela

Kang ngiris ati

Nanging, kenangan ora liya mung kenangan

Kang terkadang ngrujit rasa

Kang mili terus gumingsir

Wektu tan kendhat lumingsir

Nggawe kang biyen seger saiki klenger

Umur uzur nyaketi kubur

Tan kabendung terus mbanjur

Kang biyen barengan saiki kijenan

Marga banyu tansah mili tanpa kendhat

Kang biyen seger saiki kengser

Lan kang wis lunga ora tau bali teka

Terus mili milir kentir

Nganti akir tanpa kendhat milir

Kabeh kentir , kabeh kentir

                                                                                                                                                                                14 Mei 2008